شعر العاميه

درج الياسمين
للشاعر -- محمد مـدنــــــــى

أنا أول واحد
فـ الدرج أتحط
كانت بضفيرة طويلة البت
و الواد كان شنبه
كمان بيخط
الكحلي عليها
و الكحل مرشرش
فــ عينيها
بيدفي اللب السوبر
بالذات فــ أواخر أكتوبر
لما المطرة ترخ
و العربية بتدهس ميه
علينا تبخ
ناعمة أيديها
آنا دابت أوراقي
فـ أيديها
و الواد دوب
عينه فــ عينيها
و تانينا
عقد الفل
على كوبري قصر النيل
من بس يدوب سنتين
فــ ليلة صيف من شهر
يوليو
الواد بنص كم
و عينيه مش شايفة
الهم
أتلم يا فرح أتلم
والبت
كمان مش شايفة الجرح
مش عارفة الغم
(يا عود قرنفل ما تقول حكايتك)
(حاضر يا عم ياسمين عينيه)
من جنينة الحرية
أتقطفت
كنت هدية
و يدوب بصيت فــ عينيها
اتخطفت
و اتمشينا لحد البرج
و نهيتي أتحطيت فــ الدرج
وسط الصحاب
و كان معانا
وردة حمرا
قعدت يوم ...... و تاني يوم
اتحطت فــ كتاب
كانت البنيه فرحانة بيها
من فرحتها
عرفنا - صحيح الهوى غلاب –
تـــــــــــــــــك
دا بايين جيلنا ضيف
يا عم ياسمين هوه فيه مكان
معلش يا أخونا نشيل بعض أصلها أزمة صيف
أسم الكريم؟
أنا عود ريحان